Su 16 de bennarzu, pro S. Antoni de su Fogu, finas ocannu s'est fata sa "Sagra de sa sartitza montrestina".

Su note, a colore a fogu, sa zente at chenadu a fae cun lardu, sartitza arrustu e binu nieddu, allegrada dae sa mùsica de "Cordas et Cannas".

Su 22 de martu e su 9 de abrile de su 2009 sa rassigna "Montresta Innesta" at aunidu su praghere de sa connoschèntzia (cun esertzitatziones de innestu de pirastos e ozastros) a cussu de s'educatzione ambientale e de sa bona coghina.

Dae s'8 de bennarzu 2009, comente ogni annu, sunt comintzadas sas preparativas pro sa festa de S. Antoni de su Fogu.

Su 16 a sero, a pustis de tantu preparare, chena pro totus e s'ispetàculu "Lame a foglia d'oltremare".

S'1 e su 2 de austu de su 2008 bi sunt istados sos cuntzertos "Emergenti for Emergency", in s'àmbitu de sa rassigna "Montr&state 2008".

Su 27 de trìulas de su 2008 su grupu "The Gang" s'est esibidu in cuntzertu in s'anfiteatru comunale. In abertura de serada s'est esibidu Andrea Sigona.

Su 9 de martu de su 2008 sa rassigna "Montresta Innesta" at dadu sa possibilidade a sos amantiosos de sa natura de passare una die in su silèntziu e in sa paghe de sa natura.

Pro S. Antoni de su Fogu 2008 sa festa est istada allegrada dae sa "Sagra de sa sartitza montrestina".

A su sero, a pustis de sa chena a inghìriu de su fogu, sos cantadores Porcu e Denanni ant allegradu sa serada, acumpagnados dae Matzau (chiterra) e Sannia (fisarmònica).

Su 16 de bennarzu de su 2008, in sa piata de chègia betza, sos cantadores a chiterra Porcu e Denanni, acumpagnados dae Matzau (chiterra) e Sannia (fisarmònica), ant animadu sa festa pro sos antzianos. Sa manifestatzione est istada presentada dae Ireneo Ledda
 

Su 5 de bennarzu de su 2007 su coro polifònicu "Bonacatu" de Bonàrcadu e su coro "Santu Atzei" de Simaxis si sunt esibidos in chègia betza cun su "Cuntzertu de sos Tres Res".

Su 4 de austu de su 2007 in Su Palatu 'e Silva Manna s'est fata sa segunda editzione de su "Trofeo Comune di Montresta", cun cursa de caddos 'a s'aneddu'. At partetzipadu su Grupu Ipicu Itiresu.

Su 28 de trìulas de su 2007 Montresta at ospitadu sos cantadores Donaera, Ladu e Iscanu (paris cun su Tenore de Lei) pro una gara de poesia sarda intitulada "Rimas Noas".

Su 27 de trìulas de su 2007, pro "Montr&state 2007", Montresta at ospitadu sa manifestatzione "Montresta Rock". Ant cantadu sos grupos Broken Melody, Canberra, Diadema, Esxapsy, Stearling, The Wookis, Tortuga.

Paris cun sos cuntzertos, s'est fata finas sa Festa de sa Birra.

Su 7 de Nadale de su 2007 in sa ludoteca comunale pitzinnos e mannos ant partetzipadu a su primu Festival intituladu "Nadale in poesia".
A pustis de sa declamatzione de sas poesias in cuncursu, sos cantadores DONAERA, LADU E MUREDDU ant serradu sa serada cun una gara de poesia 'a bolu'.

2008: Sos amantiosos de sa natura, de s'arte e de s'artigianadu traditzionale podent agatare in custa brochure (fata in su 2008) una sìntesi de totu sas bellesas de Montresta

Cun pagas paràulas (SA BIDDA INGHIRIADA DAE SA NATURA) custa brochure pintat a Montresta e dat a chie est interessadu a connòschere sa bidda totu sos elementos pro si nde fàghere un'idea crara.